බංග්ලාදේශ හිමිනම නිහඬ විරෝධතාවක
පාස්පෝට් එක පැහැරගත් නිසා මවගේ මරණයටත් යන්න බැරිවුණා හිමිනම හැඬූ කඳුළින් මාධ්යයට කියයි.
තමන් වහන්සේ වැඩසිටි කාමරයේ දොරගුළු කඩා බලහත්කාරයෙන් ඇතුළුවී තමාට අමානුෂික ලෙස පහරදී අතවර කොට සිය විදේශ ගමන් බලපත්රය, මුදල් හා භාණ්ඩ පැහැර ගෙන ගොස් වසර 10කට ආසන්න කාලයක් ගතවී ඇතත් මේ දක්වා සාධාරණ පරීක්ෂණයක් ඉටුවී නැතැයි චෝදනා කරමින් බංග්ලාදේශ ජාතික තරුණ භික්ෂූන් වහන්සේ නමක් විරෝධතා පුවරුවක් අතැතිව ඊයේ (28 දා) නීතිපති දෙපාර්තමේන්තුව අසල නිහඬ විරෝධතාවයක නිරතවිය.
2012.12.06 වැනිදා රාත්රි මහරගම පිළිකා රෝහලේ සුබසාධක මධ්යස්ථානයේ වැඩසිටියදී තමන් වහන්සේ එම හිංසාවලට ගොදුරුවූ බවත් අවස්ථා කිහිපයකදීම මහරගම පොලිස් ස්ථානයට හා පොලිස්පති සහන මැදිරියට ඒ සම්බන්ධයෙන් පැමිණිලි කර ඇතත් මෙතෙක් සාධාරණයක් ඉටුවී නැතැයිද උන්වහන්සේ පෙන්වා දුන්හ.
නීතිපති දෙපාර්තමේන්තුවට පිවිසෙන මාර්ගය අසල බිම වාඩිවී ඊයේ (28දා) උදෑසන පැය කිහිපයක්ම එලෙස නිහඬ විරෝධතාවයක නිරතවූ උන්වහන්සේ අසලට පැමිණි කෙසෙල්වත්ත පොලිසියේ ජ්යෙෂ්ඨ පොලිස් නිලධාරීහු දුරකථන මාර්ගයෙන් නීතිපති දෙපාර්තමේන්තුවේ නිලධාරියකු සම්බන්ධ කිරීමට පියවර ගත්හ.
කඩිනමින් උන්වහන්සේට සාධාරණයක් ඉටුකිරීමට අවශ්ය පියවර ගන්නා බව නීතිපති දෙපාර්තමේන්තුවේ නිලධාරිවරයා එකඟවීම නිසා මේ වනවිට පිළියන්දල මඩපාත ශෛලතලාරාමයේ වැඩවසන බංග්ලාදේශ සෝබිත හිමියෝ එම විරෝධතාවයෙන් ඉවත්වූහ.
සිය විදේශ ගමන් බලපත්රය පැහැර ගැනීම නිසා සිය මවගේ මරණයේ අවසන් කටයුතුවලට හෝ සහභාගිවීමට නොහැකිවූ බවත් බංග්ලාදේශයේ සිට ශ්රී ලංකාවට පැමිණ පැවිදිවී හෝමාගම බෞද්ධ හා පාලි විශ්වවිද්යාලයේ අධ්යාපනය හදාරමින් සිටියදී තමන් එකී අවාසනාවන්ත තත්ත්වයට පත්වූ බවත් උන්වහන්සේ හැඬූ කඳුළින් මාධ්ය හමුවේ ප්රකාශ කළහ.
