දේශීය ආදායම් කොමසාරිස්වරියට අධිකරණයෙන් නියෝගයක්

බදු නොගෙවූ බව කියන පෞද්ගලික ආයතනයකට එරෙහිව ගොනු කළ නඩුවකට අදාල වාර්තාවක් අධිකරණයට ඉදිරිපත් නොකිරීම සම්බන්ධයෙන් ලබන ජනවාරි 7 දින අධිකරණය හමුවේ පෙනී සිට කරුණු දක්වන ලෙස දේශීය ආදායම් කොමසාරිස්වරියට කොළඹ අතිරේක මහේස්ත්‍රාත් බණ්ඩාර ඉලංගසිංහ මහතා අද (02) නියෝග කළා.

මිලියන හතක බදු මුදලක් නොගෙවීම සම්බන්ධයෙන් දේශීය ආදායම් දෙපාර්තමේන්තුව මගින් පෞද්ගලික ආයතනයකට එරෙහිව අධිකරණය හමුවේ නඩුවක් ගොනුකර ඇති බවත් එම නඩුවට අදාළ වාර්තාවක් අද දින අධිකරණයට ඉදිරිපත් කරන ලෙසට අධිකරණය මගින් එම දෙපාර්තමේන්තුවට කර තිබූ නියෝගයක් පැහැර හැරීම සම්බන්ධයෙන් කරුණු දැක්වීම සඳහා කොමසාරිස්වරියට එසේ අධිකරණය හමුවේ පෙනී සිටින ලෙසට අධිකරණයෙන් නියම කෙරුණු බවයි දසත අධිකරණ වාර්තාකරු පැවසුවේ.

ගෙවිය යුතු බදු මුදලින් ලක්ෂ පහළොවක පමණ මුදලක් මේ වන විට ගෙවා අවසන් කර ඇති නමුත් ඒ සම්බන්ධයෙන් කරුණු දැක්වීම සඳහා දේශීය ආදායම් දෙපාර්තමේන්තුවේ නියෝජිතයකු අධිකරණය හමුවේ පෙනී සිට නොමැති බවට එම පෞද්ගලික සමාගම වෙනුවෙන් පෙනී සිටි නීතිඥවරයා අධිකරණය හමුවේ දැක්වූ කරුණු සැලකිල්ලට ගනිමින් මහේස්ත්‍රාත්වරයා එම නියෝගය නිකුත් කළා.