අපරාධ පරීක්ෂණ දෙපාර්තමේන්තුව විසින් තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා දේවගැති ජෙරොම් ප්‍රනාන්දු විසින් ඉදිරිපත් කර තිබෙන රිට් පෙත්සම විභාගයට නොගෙනම නිෂ්ප්‍රභ කරන ලෙස සීමිත විරෝධතා ගොනු කර තිබෙන බව නීතිපතිවරයා අභියාචනාධිකරණයට හමුවේ දැනුම් දුන්නා.
මෙම පෙත්සම අද අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබුවා.
මෙහි දී නීතිපතිවරයා වෙනුවෙන් පෙනී සිටි ජ්‍යෙෂ්ඨ රජයේ නිතීඥ ෂමින්ද වික්‍රම මහතා අධිකරණයට දැනුම් දුන්නේ මෙම පෙත්සමට අදාළව සීමිත විරෝධතා ඉදිරිපත් කර තිබෙන බවයි.
ඉන් අනතුරුව පෙත්සම සලකා බැලීම සඳහා සැප්තැම්බර් මස 21 වනදා කැඳවන ලෙස අධිකරණය නියෝග කළා.
පෙත්සම්කරු කියා සිටින්නේ තමා විසින් සිදු කළ ප්‍රකාශයකින් බුදුදහම ඇතුළු ආගම් වලට අපහාස කළේ යැයි කියන සිද්ධියක් සම්බන්ධයෙන් අපරාධ පරීක්ෂණ දෙපාර්තමේන්තුව විසින් සිවිල් හා දේශපාලන අයිතිවාසිකම් පනත හා දණ්ඩ නීති සංග්‍රහය යටතේ කොළඹ කොටුව මහේස්ත්‍රාත් අධිකරණයට කරුණු වාර්තාකර තම විදේශ ගමන් තහනම් කරමින් නියෝගයක් ද ලබා ගෙන තිබෙන බවයි.
මෙම සිද්ධිය සම්බන්ධයෙන් තමන්ව අත්අඩංගුවට ගැනීමේ අවදානමක් මතුව තිබෙන බවත් ප්‍රමාණවත් සාක්ෂි ඉදිරිපත් වී නොමැති අවස්ථාවක එලෙස අත්අඩංගුවට ගැනීම නීතියට පටහැනි ක්‍රියාවක් බවත් පෙත්සම්කරු පවසනවා.
ඒ අනුව තමන්ව අත්අඩංගුවට ගැනීම වැළැක්වීමේ අතුරු නියෝගයක් නිකුත් කරන ලෙසත් තමන්ට එරෙහිව කොළඹ කොටුව මහේස්ත්‍රාත් අධිකරණය හමුවේ අපරාධ පරීක්ෂණ දෙපාර්තමේන්තුව විසින් ආරම්භ කර තිබෙන නඩු කටයුත්ත බලරහිත කිරීමේ නියෝගයක් නිකුත් කරන ලෙස පෙත්සම්කාර දේවගැතිවරයා අධිකරණයෙන් ඉල්ලා සිටිනවා
