දුම්රිය වැසිකිළියක දමා ගොස් තිබූ දින 13ක් වයසැති කුඩා බිළිඳාගේ දෙමව්පියන් සොයාගෙන තිබෙනවා.
අවුරුදු 25ක සහ 26ක අවිවාහක යුවළක් වන ඔවුන් දෙදෙනා බණ්ඩාරවෙල සහ කොස්ලන්ද පොලිස් ස්ථාන මගින් අත්අඩංගුවට ගෙන ඇති බවයි වාර්තා වන්නේ.
ඊයේ (10) රාත්‍රී 7ට පමණ මඩකලපුව බලා පිටත්ව යාමට සූදානම්ව තිබූ මීනගයා දුම්රියේ වැසිකිළියක දමා ගොස් සිටි මෙම බිළිඳා, මගියෙකු විසින් දැක දුම්රිය බලධාරීන් දැනුවත් කර තිබුණා.
අනතුරුව මෙම බිළිදාගේ මව්පියන් සොයා පොලිසිය විමර්ශන ආරම්භ කර තිබූ අතර බණ්ඩාරවෙල පොලිසියේ විශේෂ විමර්ශණ ඒකකයට ලැබුණු තොරතුරක් අනුවයි මොවුන් සොයාගෙන ඇත්තේ.
බණ්ඩාරවෙල නායබැද්ද හා කොස්ලන්ද යන ප්‍රදේශවලදී ඔවුන් හමුවී ඇති අතර ඔවුන්ගෙන් මේ වනවිට වැඩිදුර ප්‍රශ්න කිරීම් සිදුකරන බව පොලිසිය සඳහන් කළා.
සැකකාර තරුණයා දෙහිවල ප්‍රදේශයේ රැකියාවක නිරතවී ඇති අතර තරුණියට දරුවෙකු ලැබීමට සිටින බවට තොරතුරු හෙළිවීමෙන් පසු ඇය සමග කොළඹ ප්‍රදේශයේ නතර වී ඇති බවටයි මූලික විමර්ශනවලදී හෙළිවී ඇත්තේ.
ඊයේ පස්වරුවේ රිජ්වේ ආර්යා ළමා රෝහලට ඇතුලත් කළ බිළිඳා මේවන විට යහපත් සෞඛ්‍ය තත්ත්වයෙන් පසුවන බවයි වාර්තා වන්නේ.
හදිසි ප්‍රතිකාර ඒකකයට ඇතුලත් කළ එම බිළිඳා මේවන විට සාමාන්‍ය වාට්ටුවකට යොමු කර තිබුණා.
බිළිඳාගේ සිරුර මද වශයෙන් කහ පැහැති ගතියක් පෙන්නුම් කර ඇති අතර මව් කිරි ලැබීම අඩුවීම හෝ රුධිර ඝණවල වෙනසක් හේතුවෙන් එම තත්ත්වය සිදුවන්නට ඇති බවටයි රිජ්වේ ආර්යා ළමා රෝහලේ නියෝජ්‍ය අධ්‍යක්ෂවරයා කියාසිටියේ.
