පසුගිය සඳුදා තුර්කියේ සහ සිරියාවේ ඇති වූ රික්ටර් පරිමාණයේ 7.8 ක භූමිකම්පාවෙන් පුද්ගලයින් 23,700 කට වැඩි පිරිසක් මේ වනවිට ජීවිතක්ෂයට පත්ව ඇති බව විදෙස් මාධ්‍ය වාර්තා කරනවා.
වයිට් හෙල්මට් නැමැති ස්වේච්ඡා සංවිධානයට අනුව සිරියාවේ කැරලිකරුවන්ගේ ග්‍රහණයේ පවතින ප්‍රදේශවල සෝදිසි කිරීම් සහ මුදාගැනීමේ මෙහෙයුම් අවසන්ව ඇති බවයි වාර්තා වන්නේ.
එමෙන්ම තුර්කිය තුළ සිටින සහන සේවා කණ්ඩායම් තවමත් සුන්බුන් අතර සිරවී සිටින අයගේ දිවි ගලවා ගැනීමේ උත්සාහයේ නිරතව සිටින බවයි විදෙස් වාර්තා සඳහන් කරන්නේ.
මේ අතර වයඹ දිග සිරියාවේ කැරලිකරුවන්ගේ ග්‍රහණයේ පවතින ප්‍රදේශවලට සැපයුම් බෙදා හැරීම සංකීර්ණ වී ඇති අතර, සිරියානු රජය සිකුරාදා (ඊයේ ) එම ප්‍රදේශවලට ආධාර යැවීම අනුමත කළ නමුත් නිශ්චිත කාලයක් තවමත් සඳහන් කර නැහැ.
භූමිකම්පාවෙන් දිවි ගලවා ගත් පුද්ගලයින්ගෙන් බොහෝ දෙනෙක්ට සිය නිවාස අහිමව ගොස් ඇති අතර, පවතින අධික සීතල වඩාත් නරක අතට හැරෙන හා බිහිසුණු තත්වයන්ට තුඩු දෙන බැවින් “ද්විතියික ව්‍යසනයකට” මුහුණ දිය හැකි බවයි ලෝක සෞඛ්‍ය සංවිධානය සඳහන් කළේ.
මේ අතර සඳුදා ඇති වූ මෙම භූමිකම්පාවෙන් පසු තුර්කියේ පාසල් වොලිබෝල් ක්‍රීඩිකාවන් පිරිසක් ද කඩා වැටුණු හෝටලයක සිරව ඇති බවට තොරතුරු වාර්තා වනවා.
ගලවාගැනීමේ කණ්ඩායමේ සිදුකළ සෝදිසි කිරීමේදී එම කණ්ඩායමේ තිදෙනෙකුගේ මළ සිරුරු සොයාගෙන තිබෙනවා.
ගුරුවරුන් දෙදෙනෙකුගේ සහ සිසුවියකගේ මළ සිරුරු අඩියමාන් හි ඉසියාස් හෝටලයෙන් මෙලෙස සොයා ගත් බවයි තුර්කි බලධාරීහු සඳහන් කළේ.
