තලංගම පොලිස් වසමේ, දකුණු තලංගම ප්‍රදේශයේ නිවසක සැකකටයුතු ලෙස කාන්තාවක් මියගොස් සිටි බවට ලද තොරතුරකට අනුව පොලිසිය පරීක්ෂණ ආරම්භ කර ඇති බව වාර්තා වනවා.
නිවසක තනිව ජීවත් වූ වයස අවුරදු 72ක කාන්තාවක් මෙලෙස අභිරහස් ලෙස මියගොස් සිටිය දී ඊයේ (21) සොයාගෙන තිබෙනවා.
අදාළ කාන්තාවගේ පුත්‍රයා මහරගම ප්‍රදේශයේ පදිංචිව සිට ඇති අතර, සිය මව දුරකථනයට ප්‍රතිචාර නොදැක්වීම හේතුවන් නිවසට පැමිණ කළ සොයා බැලීමේ දී ඇය මියගොස් සිටි බවටයි පොලිසියට පවසා ඇත්තේ.
කෙසේ වෙතත් ඊයේ (21) රාත්‍රියේ පිටුපස දොරෙන් කිසියම් අයෙක් නිවසට ඇතුලු වී නිවසේ තිබූ රූපවාහිනී යන්ත්‍රය සහ දුරකථනයක් සොරාගෙන ගොස් ඇති බවටයි අනාවරණය වී ඇත්තේ.
මෙය ඝාතනයක් ද නැත්නම් ස්වභාවික මරණයක් ද යන්න සම්බන්ධයෙන් තලංගම පොලිසිය වැඩිදුර පරීක්ෂණ පවත්වනවා.
මෘත ශරීරය මහේස්ත්‍රාත් පරීක්ෂණය සිදු කිරීමෙන් පසු පශ්චාත් මරණ පරීක්ෂණය සඳහා කොළඹ ජාතික රෝහල වෙත යොමුකර තිබෙනවා.
