ජපාන සමාගමක් ඇමෙරිකානු ඩොලර් මිලියන 30 ක් වටිනා රොබෝ යන්ත්‍රයක් නිපදවා තිබේ.
එය ශ්‍රි ලංකා මුදලින් රුපියල් කෝටි 980 ක් පමණ වනවා. ජපානයේ ප්‍රසිද්ධ සජීවිකරණ කතා මාලාවක් වන මොබයිල් සූට් ගුන්දාම් හි සිටි රොබෝවරයෙකුට බෙහෙවින් සමාන අයුරින් මෙම රොබෝ යන්ත්‍රය නිර්මාණය කර තිබෙනවා.
මෙම රොබෝ යන්ත්‍රය ආර්චැක්ස් යන නමින් හඳුන්වනු ලබයි.
එහි උසින් මීටර් 4.5 ක් වන අතර බරින් ටොන් 3.5 කි. පුද්ගලයෙකුට මෙම රොබෝ යන්ත්‍රය තුළට ඇතුළු විය හැකි අතර රොබෝ යන්ත්‍රය තුළ සිට එහි තිබෙන පාලක පද්ධතිය මගින් ආර්චැක්ස්ගේ අත් පා පාලනය කිරීමට ඇතුලත සිටින පුද්ගලයාට හැකියාව පවති.
ආර්චැක්ස් මෙම මස අවසානයේ ජපානයේ පවත්වන ප්‍රදර්ශනයකදී එළිදැක්වීමට නියමිතය.
රෝද හතරක් සහිත ආර්චැක්ස්ට මුහුණුවර දෙකක් තිබේ.ආර්චැක්ස්ට රොබෝවරයෙකු හෝ මෝටර් රථයක් ලෙස ක්‍රියාකිරීමට හැකියාව පවතී.
මෝටර් රථයක් ලෙස ක්‍රියා කරන විට පැයට කිලෝ මීටර 10 ක වේගයෙන් ගමන් කිරීමට මෙයට හැකියාව තිබේ
