2016 වසරේ රාජගිරිය ප්රදේශයේදී සිදුවූ රිය අනතුරක් පිළිබඳ නඩුව අද (18) කොළඹ මහාධිකරණයේදී කැඳවනු ලැබීය.
එම අනතුරේ සාක්ෂි වසන්කිරීම ඇතුළු චෝදනා එල්ලවී සිටින හිටපු අමාත්ය පාඨලී චම්පික රණවක මහතා ඇතුළු විත්තිකරුවන් තුන්දෙනෙකුට එරෙහි නඩුවේ සාක්ෂි විභාගය කල්දමන ලෙස එහි විත්ති පාර්ශ්වය වෙනුවෙන් කළ ඉල්ලීමක් කොළඹ මහාධිකරණය අද ප්රතික්ෂේප කළේය.
මෙම නඩුව අද කොළඹ මහාධිකරණ විනිසුරු දමිත් තොටවත්ත මහතා ඉදිරියේ කැඳවනු ලැබීය.
එහිදී විත්තිකාර පාඨලී චම්පික රණවක මහතා වෙනුවෙන් පෙනීසිටි ජනාධිපති නීතිඥ සරත් ජයමාන්න මහතා අධිකරණය හමුවේ කරුණු දක්වමින් මෙම නඩුවට අදාළ ලේඛන සමහරක් තමන් වෙත ලැබි නොමැති හෙයින් මෙම අවස්ථාවේ නඩු විභාගය පැවැත්වුවහොත් තම සේවාදායකයාට අගතියක් සිදුවිය හැකි නිසා එම ලේඛන ලැබෙනතුරු සාක්ෂි විභාගය කල්දමන ලෙස ඉල්ලා සිටියේය.
එම ඉල්ලීමට පැමිණිල්ල වෙනුවෙන් පෙනී සිටි ජ්යෙෂ්ඨ නියෝජ්ය සොලිසිටර් ජනරාල් දිලීප පිරිස් මහතා ඊට විරෝධය පළකර සිටියේය.
දෙපාර්ශවය විසින් ඉදිරිපත් කළ කරුණු සලකා බැලූ මහාධිකරණ විනිසුරුවරයා විත්තිය විසින් ඉදිරිපත් කරන මෙම කරුණ නඩුවිභාගයක් කල් තැබීම සඳහා සාධාරණ හේතුවක් නොවන බව පෙන්වා දුන්නේය.
