කරාපිටිය ශික්ෂණ රෝහලේ අද (05) පෙරවරුවේ ක්‍රියාත්මක කිරීමට සූදානම් වූ අඛණ්ඩ වැඩ වර්ජනය අත්හිටුවා තිබෙනවා.
දසත ප්‍රාදේශීය වාර්තාකරු පැවසුවේ; එම රෝහලේ පිළිකා අංශයේ සේවය කරන විශේෂඥ වෛද්‍යවරයෙකුගේ ක්‍රියා කලාපයට එරෙහිව මෙම වර්ජනය සිදු කිරීමට රෝහල් කාර්‍යය මණ්ඩලය තීරණය කර තිබූ බවයි.
මීට පෙර අවස්ථාවක ද මෙම විශේෂඥ වෛද්‍යවරයාගේ ක්‍රියා කලාපයට එරෙහිව විවිධ විවේචන සහ විරෝධතා රෝහල් සංකීර්ණය තුළ ක්‍රියාත්මක වුණා.
නිසි තීරණයක් රෝහල් පරිපාලනයෙන් නොලැබුණහොත්; අද සිට අඛණ්ඩ වෘත්තීය ක්‍රියාමාර්ගයකට එළැඹීමට තීරණය කළ බව රජයේ වෛද්‍ය නිලධාරීන්ගේ සංගමයේ සමලේකම් වෛද්‍ය අසංක කෝණාර මහතා ප්‍රකාශ කළා.
කෙසේවෙතත් අදාළ විශේෂඥ වෛද්‍යවරයාගේ ක්‍රියා කලාපයට එරෙහිව පැවැත්වීමට සූදානම් කර තිබූ වැඩ වර්ජනය නවතා ඇත්තේ සෞඛ්‍ය අමාත්‍යාංශයෙන් ඔහුට ස්ථාන මාරුවක් ලබා දීම නිසාවෙන්.
එබැවින් විරෝධතාව ඇරඹීමට පෙර කරාපිටිය රෝහල් අධ්‍යක්ෂවරයා විසින් සිය සේවකයින්ට දන්වා ඇත්තේ අදාළ විශේෂඥ වෛද්‍යවරයාව මහරගම අපේක්ෂා රෝහලට මාරු කර යැවීමට අදාළ අනුමැතිය මේ වනවිට ලැබී ඇති බවයි.
