එක අරමුණකින් වැඩ කර අප මාතෘභූමිය මීට වඩා හොඳ රාජ්යයක් බවට පත් කරගැනීමට කැප වන ලෙස ජනාධිපති අනුර කුමාර දිසානායක මහතා රාජ්ය සේවකයින්ට ආරාධනා කර සිටිනවා.
ජනාධිපතිවරයා මේ බව පැවසුවේ; ආරක්ෂක අමාත්ය ධුරයේ වැඩ භාර ගැනීමේ අවස්ථාවට අද (22) පෙරවරුවේ අකුරේගොඩ ආරක්ෂක සේනා මූලස්ථානයේ පිහිටි ආරක්ෂක අමාත්යාංශයේ දී එක්වෙමින්.
ආරක්ෂක අමාත්යාංශය වෙත පැමිණි ජනාධිපතිවරයා ව එහි කාර්ය මණ්ඩලය විසින් ඉතා ගෞරවයෙන් පිළිගනු ලැබුවා.
අනතුරුව ආරක්ෂක අමාත්යාංශයේ වත්මන් ක්රියාකාරිත්වය සහ ඉදිරි කටයුතු පිළිබඳව ජනාධිපතිවරයා ත්රිවිධ හමුදාපතිවරුන් සහ ආරක්ෂක අමාත්යාංශයේ ප්රධානීන් සමඟ සාකච්ඡාවකට ද එක් වුණු බවයි ජනාධිපති මාධ්ය අංශය නිවේදනය කළේ.
යහපත් ආණ්ඩුකරණයක් වෙනුවෙන් නව රජය කැප වී සිටින බවත්, රට ගොඩනැගීමේ වැඩපිළිවෙළට සියලු දෙනාගේ සහාය අපේක්ෂා කරන බවත් ජනාධිපතිවරයා මෙහිදී ප්රකාශ කළා.
ව්යවස්ථා නීතිවල කුමන අණපනත් පැවතියත්; ප්රබල වන්නේ ජනතාවගේ බලය බව ද මෙහිදී අවධාරණය කළ ජනාධිපතිවරයා, පසුගිය ජනාධිපතිවරණයේ දී සහ මහ මැතිවරණයේදී ලබා දුන් ජනවරමේ සංයුතිය සහ හැඩතල දෙස බැලූ විට ඔවුන්ගේ එම අපේක්ෂාවන් පිළිඹිඹු කෙරෙන බව ද පැවසුවා.
එහිදි රාජ්ය සේවය මෑත ඉතිහාසයේ මැතිවරණයක දී ලබා දුන් 80%කට ආසන්න ප්රමාණයක වරමක් රජයට ලබා දුන්නේ මෙම වෙනස ඔවුන්ගේ ද ප්රාර්ථනයක් බවට පත්ව තිබෙන නිසා බවයි ජනාධිපතිවරයා වැඩිදුරටත් සඳහන් කළේ.
එබැවින් දේශපාලන අධිකාරිය ලෙස තම රජයට ජනතාවගේ මෙම අපේක්ෂාවන් ඉටු කිරීම සඳහා දේශපාලන නායකත්වය සැපයීම හැර ඉන් පිටත කිසිදු අරමුණක් නැති බව පැවසු ජනාධිපති අනුර කුමාර දිසානායක මහතා එය යථාර්ථයක් බවට පත් කර ගැනීමට රාජ්ය සේවකයන්ගේ සහාය අවශ්ය බවයි කියා සිටියේ.
සියලු දෙනා අපේක්ෂා කරන මෙම නව පරිවර්තනයේ දී රාජ්ය සේවය පිළිබඳ පොදු ජනතාවගේ විශ්වාසය තහවුරු කිරීමකින් තොරව ඉදිරියට යා නොහැකි බවත්, දියුණු වූ සෑම රටකම එම ආර්ථික සහ සමාජයීය වර්ධනය සඳහා පිම්ම ගෙන දුන්නේ රාජ්ය සේවය බවත් පැවසුවා.
ආරක්ෂක නියෝජ්ය අමාත්ය මේජර් ජෙනරාල් (විශ්රාමික) අරුණ ජයසේකර, ආරක්ෂක අමාත්යාංශයේ ලේකම් එයාර් වයිස් මාර්ෂල් (විශ්රාමික) සම්පත් තුයියකොන්තා, ආරක්ෂක මාණ්ඩලික ප්රධානී ජෙනරාල් ශවේන්ද්ර සිල්වා, යුද හමුදාපති ලුතිනන් ජෙනරාල් විකුම් ලියනගේ, ගුවන් හමුදාපති එයාර් මාර්ෂල් උදේනි රාජපක්ෂ, නාවික හමුදාපති වයිස් අද්මිරාල් ප්රියන්ත පෙරේරා යන මහත්වරුන්, ආරක්ෂක අංශ සාමාජිකයන්, ආරක්ෂක අමාත්යාංශයේ කාර්ය මණ්ඩලය ඇතුළු පිරිසක් මෙම අවස්ථාවට එක්ව සිටියා.
